42M_പാപത്തിന് റെ ന്യായവിധി നമുക്ക് അനുഗ്രഹമാണ്
അനന്തരം യാക്കോബ് തന്റെ പുത്രന്മാരെ വിളിച്ച് അവരോടു പറഞ്ഞത്: കൂടിവരുവിൻ, ഭാവികാലത്തു നിങ്ങൾക്കു സംഭവിപ്പാനുള്ളതു ഞാൻ നിങ്ങളെ അറിയിക്കും.
2 യാക്കോബിന്റെ പുത്രന്മാരേ: കൂടിവന്നു കേൾപ്പിൻ; നിങ്ങളുടെ അപ്പനായ യിസ്രായേലിന്റെ മൊഴിക്കു ചെവിതരുവിൻ!
3 രൂബേനേ, നീ എന്റെ ആദ്യജാതൻ, എന്റെ വീര്യവും എന്റെ ശക്തിയുടെ ആദ്യഫലവും ശ്രേഷ്ഠതയുടെ വൈശിഷ്ട്യവും ബലത്തിന്റെ വൈശിഷ്ട്യവും തന്നെ.
4 വെള്ളംപോലെ തുളുമ്പുന്നവനേ, നീ ശ്രേഷ്ഠനാകയില്ല; നീ അപ്പന്റെ കിടക്കമേൽ കയറി അതിനെ അശുദ്ധമാക്കി; എന്റെ ശയ്യമേൽ അവൻ കയറിയല്ലോ.
5 ശിമെയോനും ലേവിയും സഹോദരന്മാർ; അവരുടെ വാളുകൾ സാഹസത്തിന്റെ ആയുധങ്ങൾ.
6 എന്നുള്ളമേ, അവരുടെ മന്ത്രണത്തിൽ കൂടരുതേ; എൻ മനമേ, അവരുടെ യോഗത്തിൽ ചേരരുതേ; തങ്ങളുടെ കോപത്തിൽ അവർ പുരുഷന്മാരെ കൊന്നു; തങ്ങളുടെ ശാഠ്യത്തിൽ കൂറ്റന്മാരുടെ വരിയുടച്ചു.
7 അവരുടെ ഉഗ്രകോപവും കഠിനക്രോധവും ശപിക്കപ്പെട്ടത്; ഞാൻ അവരെ യാക്കോബിൽ പകുക്കയും യിസ്രായേലിൽ ചിതറിക്കയും ചെയ്യും.
28 യിസ്രായേൽഗോത്രം പന്ത്രണ്ടും ഇവ ആകുന്നു; അവരുടെ പിതാവ് അവരോടു പറഞ്ഞത് ഇതു തന്നെ; അവൻ അവരിൽ ഓരോരുത്തന് അവനവന്റെ അനുഗ്രഹം കൊടുത്ത് അവരെ അനുഗ്രഹിച്ചു.
1980, ഒക്ടോബര് 6ന് കേരളനാടിനെ ഒന്നടങ്കം നടുക്കിയ സംഭവമായിരുന്നു തിരുവല്ലയിലെ കരിക്കന്വില്ല കൊലപാതകം. ഒരു ക്രിസ്തീയ കുടുംബത്തില് ജനിച്ചു എങ്കിലും, മദ്യത്തിന്നും, മയക്കുമരുന്നിന്നും അടിമയായി പാപപങ്കിലമായ ജീവിതം നയിച്ച വ്യക്തിയായിരുന്നു മദ്രാസിലെ മോന് എന്ന അപരനാമത്താല് അന്നുമുതല് അറിയപ്പെട്ടിരുന്ന റെനി ജോര്ജ്ജ്. മയക്കുമരുന്ന് കച്ചവടത്തിന്ന് പണം സ്വരൂപിക്കുവാന് തന്റെ സുഹൃത്തുക്കളുമായി ആ ദിവസം തിരുവല്ലയില് വിശ്രമജീവിതം നയിക്കയായിരുന്ന സ്നേഹനിധികളായ തന്റെ അമ്മാവനെയും, ഭാര്യയെയും അവര് ദാരുണമായി കൊലപ്പെടുത്തി. പിന്നീട് താന് പിടിക്കപ്പെടുകയും വധശിക്ഷക്ക് വിധിക്കപ്പെടുകയും ചെയ്തു. പ്രായം പരിഗണിച്ച് നീതിപീഠം തന്റെ വധശിക്ഷ, ജീവപര്യന്തമായി ഇളവുചെയ്തപ്പോള് സ്നേഹത്തെ കൊലചെയ്തവന് മാപ്പര്ഹിക്കുന്നില്ല എന്ന് സമൂഹം രോഷത്തോടെ പ്രതികരിച്ചു. എന്നാല് ജയില് ജീവിത്തിന്നിടയില് താന് തന്റെ പാപത്തെക്കുറിച്ച് അനുതപിക്കയും, താഴ്മയോടെ കര്ത്താവിന്റെ കൃപയ്ക്കായി യാചിക്കയും ചെയ്തു. യേശുവിനെ തന്റെ കര്ത്താവും, രക്ഷിതാവുമായി അവന് സ്വീകരിച്ചു. ഇന്ന് നിരാലംഭരായ തടവുകാരുടെ മക്കള്ക്കും, കുടുംബങ്ങള്ക്കും തണലായി ബാംഗ്ളൂരില്, കോത്തന്നൂരിന്നടുത്ത് അവരുടെ പുനരധിവാസത്തിന്നായി ഒരു സ്ഥാപനം നടത്തി വരുന്നു. ദൈവത്തിന്റെ ന്യായവിധിയെ താഴ്മയോടെ നാം സ്വീകരിക്കയും, നമ്മുടെ പാപങ്ങള് ഏറ്റുപറഞ്ഞ് അവങ്കലേക്ക് തിരിയുകയും ചെയ്യുമ്പോള് നമ്മുടെ ജീവിതം ദൈവത്തിന്നും, മറ്റുള്ളര്ക്കും ഉപകാരപ്രദമാക്കുവാന് ദൈവത്തിന്ന് സാധിക്കും.
അവൻ്റെ ജീവിതാന്ത്യത്തോടടുത്തപ്പോള് യാക്കോബിന് 148 വയസ്സായിരുന്നു . തന്റെ ജീവിതത്തില് വിവിധ പരീക്ഷണങ്ങളിലൂടെയും വിജയങ്ങളിലൂടെയും ഈ മനുഷ്യൻ കടന്നുപോയി. അവൻ കർത്താവിൽ നിന്ന് അനേക പാഠങ്ങള് പഠിച്ചു. ഇപ്പോൾ, കർത്താവിനെ അടുത്തറിയുകയും തൻ്റെ ഇഷ്ടം മനസ്സിലാക്കുകയും ചെയ്യുന്ന ഒരുവൻ എന്ന നിലയിൽ, അവൻ തൻ്റെ മക്കളോട് പറയുകയാണ് , “നിങ്ങളുടെ അപ്പനായ യിസ്രായേലിന്റെ മൊഴിക്കു ചെവിതരുവിൻ!” അവൻ ഇപ്പോൾ ദൈവത്തിൻ്റെ പ്രതിനിധിയായാണു സംസാരിക്കുന്നത്. ഒരു വഞ്ചകനോ, ചതിക്കുന്നവനോ ആയല്ല മറിച്ച് ദൈവത്തിന്റെ ഒരു പ്രഭുവായാണ് അവന് വായ് തുറക്കുന്നത്.
യാക്കോബ് തന്റെ മക്കളോട് പറഞ്ഞ ചില അനുഗ്രഹ വാക്കുകൾ ഒറ്റ നോട്ടത്തില് ശാപമായി തെറ്റിദ്ധരിക്കപ്പെട്ടേക്കാം. ചിലത് ന്യായവിധിയുടെ വാക്കുകളായി നമുക്ക് തോന്നിയേക്കാം. അനുഗ്രഹം എന്നത് മാനുഷികമായി സന്തോഷകരവും സുഖപ്രദവുമായ ഒന്നായി നാം കരുതുന്നതിനാൽ, ഈ വാക്കുകള് എങ്ങനെ ഒരു അനുഗ്രഹമാകുമെന്ന് നാം ആശ്ചര്യപ്പെട്ടേക്കാം. ദൈവത്തിൻ്റെ അനുഗ്രഹം നമ്മെ തീർച്ചയായും സമ്പന്നരാക്കുന്നു എന്നതാണ് സത്യം, അത് ഒരിക്കലും നമ്മെ ദുഃഖത്തിന്റെ താഴ്വരയിലേക്ക് എന്നേക്കുമായി തള്ളിയിടുന്നില്ല.
ദൈവത്തിൻ്റെ അനുഗ്രഹം സത്യത്തിലും യാഥാർത്ഥ്യത്തിലും അധിഷ്ഠിതമാണ്. ദൈവം സത്യത്തിൻ്റെ ആത്മാവാണ്, സത്യത്തിലും ആത്മാവിലും ആരാധിക്കുന്നവരെ അവൻ അന്വേഷിക്കുന്നു. യാക്കോബ്, ഇവിടെ ദൈവത്തിൻ്റെ ആത്മാവിനാൽ സംസാരിക്കുന്നതിന്നാല്, തൻ്റെ ഓരോ മക്കളെയും കുറിച്ച് സത്യം മാത്രമേ സംസാരിക്കുവാന് അവന്ന് സാധിക്കയുള്ളൂ. അവൻ്റെ വാക്കുകൾ മുഖസ്തുതിയോ, വ്യക്തിപരമായ ഇഷ്ടാനിഷ്ടങ്ങളോ ഇല്ലാത്തതാണ്. തൻ്റെ പ്രിയപ്പെട്ടവനും, ഇളയമകനുമായ ബെന്യാമീനെക്കുറിച്ച് അവന് ഒരു കടിച്ചു കീറുന്ന ചെന്നായാണെന്നുള്ള അദ്ദേഹത്തിൻ്റെ വിവരണത്തിൽ നിന്ന് ഇത് വ്യക്തമാണ്.
ഈ അനുഗ്രഹങ്ങളൊന്നും യാക്കോബിൻ്റെ പുത്രന്മാരുടെ ജീവിതത്തിൽ വ്യക്തിപരമായി നിറവേറ്റപ്പെട്ടതായി നാം കാണുന്നില്ല. അവരെല്ലാവരും മിസ്രയീമിൽ വെച്ച മരണപ്പെടുകയും, അവിടെ അടക്കം ചെയ്യപ്പെടുകയും ചെയ്തു. യാക്കോബിന്റെ ഈ വാക്കുകള് മാറ്റമില്ലാത്ത പ്രവചനങ്ങളായല്ല, മറിച്ച് മുന്നറിയിപ്പുകളായി നാം കാണേണ്ടതാണ്. കാരണം മാനസാന്തരപ്പെടുന്നവരോട് ദൈവം എപ്പോഴും കരുണ കാണിക്കുന്നു എന്നുള്ള വസ്തുത നാം മനസ്സിലാക്കണം. ശെഖേമിലെ ജനങ്ങളെ ഒന്നടങ്കം കൊന്നോടുക്കിയ ലേവി യിസ്രായേലിൽ ചിതറിപ്പോകുമെന്ന് പ്രവചിക്കപ്പെട്ട കാര്യത്തിൽ ഈ കാര്യം വ്യക്തമാണ്. എന്നാൽ മോശയുടെ കാലത്ത് യിസ്രായേല്മക്കള് പൊൻ കാളക്കുട്ടിയെയുണ്ടാക്കി അതിനെ ആരാധിച്ച സമയത്ത് ലേവി ഗോത്രം ദൈവഭാഗത്ത് നിലകൊണ്ടതിന്നാല് ദൈവം അത് തിന്മയെക്കാൾ അവരുടെ നന്മയ്ക്കായി മാറ്റി. തൻ്റെ നിയമം പഠിപ്പിക്കുവാനും, നീതി നടപ്പാക്കാനും യിസ്രായേലിലുടനീളം നട്ടുപിടിപ്പിച്ച പുരോഹിത ഗോത്രമായി ലേവി മാറി. മറ്റ് ഗോത്രങ്ങള് അവരെ നിരസിക്കുന്നതിനുപകരം അവരുടെ സാന്നിധ്യം പില്കാലത്ത് തേടുകയായിരുന്നു.
യഹൂദയെ സംബന്ധിച്ചിടത്തോളം, അവൻ്റെ രണ്ട് മൂത്ത പുത്രന്മാർ അവരുടെ പാപങ്ങൾ നിമിത്തം കനാനിൽ വെച്ചു തന്നെ മരണപ്പെട്ടു. പാപപങ്കിലമായ തന്റെ ജീവിതരീതിയുടെ ഫലമായി അവൻ്റെ തലമുറകൾ ഒടുവിൽ തൻ്റെ മരുമകളായ താമാറിലൂടെ വന്നതായി നാം കാണുകയുണ്ടായി. എന്നിരുന്നാലും തൻ്റെ പിതാവിനുവേണ്ടി ഇളയ സഹോദരനായ ബെന്യാമീനെ അടിമത്തത്തിൽ നിന്ന് രക്ഷിക്കുവാൻ ഇടപെട്ടപ്പോൾ ദൈവം യൂദായെ അനുഗ്രഹിച്ചു. ഈ നല്ല പ്രവൃത്തിയിലൂടെ, തൻ്റെ സഹോദരൻ യോസേഫിനെ നേരത്തെ വഞ്ചിച്ചതിന് അവൻ പ്രായശ്ചിത്തം ചെയ്തു.
“16 നിങ്ങളെ കഴുകി വെടിപ്പാക്കുവിൻ; നിങ്ങളുടെ പ്രവൃത്തികളുടെ ദോഷത്തെ എന്റെ കണ്ണിന്മുമ്പിൽനിന്നു നീക്കിക്കളവിൻ; തിന്മ ചെയ്യുന്നതു മതിയാക്കുവിൻ.” എന്ന് തിരുവെഴുത്ത് നമ്മെ ഉപദേശിക്കുന്നു. തെറ്റ് ചെയ്യുന്നത് നിർത്തി, ശരിയായത് ചെയ്തുകൊണ്ട് നമ്മുടെ പാപങ്ങൾക്ക് പ്രായശ്ചിത്തം ചെയ്യണമെന്ന് അനുതാപത്തിൻ്റെ കൃപ നമ്മോട് ആവശ്യപ്പെടുന്നു. സത്യമായും, നമ്മുടെ കർത്താവായ യേശുവിൻ്റെ കൃപയാൽ നാം വിശ്വാസത്താൽ വിശുദ്ധീകരിക്കപ്പെടുന്നു. എന്നാൽ അവനിലുള്ള നമ്മുടെ വിശ്വാസത്തെ പ്രകടമാക്കുന്നത് നമ്മുടെ പ്രവൃത്തികളാണ്. മാനസാന്തരവും മാനസാന്തരത്തിൻ്റെ ഫലം കാണിക്കുന്ന പ്രവൃത്തികളും ഇല്ലെങ്കിൽ, വിശ്വാസം നിർജ്ജീവമാണ്.
നമ്മുടെ പൂർവ്വപിതാക്കന്മാരുടെ പാപങ്ങൾ നമ്മുടെ ജീവിതത്തിൽ സ്ഥിരമായ നിഴൽ വീഴ്ത്തുന്നില്ല. നാം നന്മ ചെയ്യുന്നുവെങ്കില്, വിശ്വാസത്തിലൂടെ ദൈവസാന്നിദ്ധ്യം നമുക്ക് പ്രതിഫലമായി ലഭിക്കും. അല്ലാത്തപക്ഷം, മത്സരികളുടെ മക്കളായതിനാൽ യിസ്രായേല്യരിൽ ആര്ക്കും തന്നെ കനാനിൽ പ്രവേശിക്കുവാന് സാധിക്കുമായിരുന്നില്ല.
ദൈവം നമ്മെ നാം ചെയ്ത പാപത്തിന് ന്യായം വിധിക്കുമ്പോൾ, ഒന്നിലധികം കാര്യങ്ങൾ സംഭവിക്കുന്നു. ഒന്നാമതായി, ദൈവത്തിൻ്റെ നീതി അതിലൂടെ വെളിവാക്കപ്പെടുന്നു. പാപത്തിനെതിരെ ന്യായപ്രമാണം നമുക്ക് മുന്നറിയിപ്പ് നൽകുന്നുണ്ട്. നമ്മില് തെറ്റ് കണ്ടെത്താൻ ദൈവം ഇഷ്ടപ്പെടുന്നതുകൊണ്ടല്ല. തീർച്ചയായും, പാപം നിയമലംഘനമാണ്, ന്യായപ്രമാണം ദൈവീക സ്വഭാവത്തിന്റെ ഒരു പ്രതിഭിംബമായതിനാല് അത് ദൈവത്തിൻ്റെ അസ്തിത്വത്തിന് എതിരാണ്. അതിനാൽ പാപം ആന്തരികമായി തിന്മയാണ്. പാപം നമ്മുടെ ആത്മാക്കളെ ദൈവത്തിൽ നിന്ന് അകറ്റുന്നു.
നാം പാപം ചെയ്യുമ്പോൾ, അതായത്, നിയമം ലംഘിക്കുമ്പോൾ, തീര്ച്ചയായും അതിനാലുള്ള നാശനഷ്ടങ്ങൾ നാം അനുഭവിക്കുന്നു. സാധാരണയായി നാം മനസ്സിലാക്കുന്നതു പോലെ ദൈവം നമ്മെ ശപിച്ചു എന്നല്ല ഇതിനർത്ഥം. ദൈവത്തില് നിന്നുള്ള ന്യായവിധിയുടെ വാക്കുകള് അവൻ നമ്മുടെമേൽ വരുത്തുന്ന ചില അനാവശ്യ ദ്രോഹമായാണ് നാം സാധാരണയായി കരുതുന്നത്. അവൻ നമ്മോട് നിര്ദയം ക്ഷമിക്കുകയും നമ്മുടെ മേൽ തിന്മ അയയ്ക്കാതിരിക്കുകയും ചെയ്യാമായിരുന്നുവെന്ന് നാം കരുതുന്നു. എന്നാൽ ദൈവത്തിൻ്റെ ന്യായവിധിയുടെ യഥാർത്ഥ അർത്ഥം നാം ഇപ്പോൾ അവൻ്റെ സ്നേഹത്തിൻ്റെയും സംരക്ഷണത്തിൻ്റെയും വലിയ വലയത്തിന് പുറത്താണ് എന്നതാണ്. ന്യായപ്രമാണത്തിൻ്റെ ദയയുള്ളതും വിവേകപൂർണ്ണവുമായ മുന്നറിയിപ്പുകൾ നാം അവഗണിച്ചതിലൂടെ നമ്മുടെ തിരഞ്ഞെടുപ്പിന്റെ അനന്തരഫലമായി മാത്രമോ നമുക്കതിനേ കാണുവാനാകൂ. അതിനെ ശരിയായ രീതിയില് നാം ഉള്കോണ്ടാല്, അത് നമ്മെ മാനസാന്തരത്തിലേക്കും, ദൈവീക കൂട്ടായ്മയിലേക്കും നയിക്കും എന്നതില് സംശയമില്ല കാരണം ന്യായവിധിയിലും ദയ ഓര്ക്കുന്നവനാണ് നമ്മുടെ ദൈവം.
ഭാവിതലമുറ ഈ ദോഷം ഒഴിവാക്കാനും ന്യായവിധി സഹായിക്കുന്നു. ന്യായവിധി അതുണ്ടാക്കുന്ന ഭൌമികവും, ആത്മീകവുമായ പ്രത്യാഖാതങ്ങള് വരുവാനുള്ള തലമുറകള്ക്ക് മുന്നറിയിപ്പായി നിലകൊള്ളുന്നു. അവര് ദൈവത്തിന്റെ ന്യായവിധിയില് അകപ്പെടുന്നതിന്നു പകരം അവർ ദൈവത്തിൻ്റെ പൂർണ്ണ നന്മ ആസ്വദിക്കുക എന്നതാണ് ദൈവീക ലക്ഷ്യം.
1 കൊരി 10:5 5 എങ്കിലും അവരിൽ മിക്കപേരിലും ദൈവം പ്രസാദിച്ചില്ല, അവരെ മരുഭൂമിയിൽ തള്ളിയിട്ടുകളഞ്ഞു എന്നു നിങ്ങൾ അറിയാതിരിക്കരുതു എന്നു ഞാൻ ആഗ്രഹിക്കുന്നു.
6 ഇതു നമുക്കു ദൃഷ്ടാന്തമായി സംഭവിച്ചു; അവർ മോഹിച്ചതുപോലെ നാമും ദുർമ്മോഹികൾ ആകാതിരിക്കേണ്ടതിന്നു തന്നേ.
10 അവരിൽ ചിലർ പിറുപിറുത്തു സംഹാരിയാൽ നശിച്ചുപോയതുപോലെ നിങ്ങൾ പിറുപിറുക്കയുമരുതു.
11 ഇതു ദൃഷ്ടാന്തമായിട്ടു അവർക്കു സംഭവിച്ചു, ലോകാവസാനം വന്നെത്തിയിരിക്കുന്ന നമുക്കു ബുദ്ധ്യുപദേശത്തിന്നായി എഴുതിയുമിരിക്കുന്നു.
മൂന്നാമതായി, ദൈവത്തിൻ്റെ ന്യായവിധികൾ നമ്മെ നിത്യനാശത്തിൽ നിന്ന് സംരക്ഷിക്കുന്നു. ആദാമും ഹവ്വയും ദൈവത്തിനെതിരെ പാപം ചെയ്തപ്പോൾ അവരെ തോട്ടത്തിൽ നിന്ന് പുറത്താക്കി. ജീവവൃക്ഷത്തിൻ്റെ ഫലം അവർ ഭക്ഷിക്കാതിരിക്കാനായിരുന്നു ഇത്. ഇത് അവരെ ദൈവത്തിൽ നിന്നുള്ള നിത്യമായ വേർപാടിലേക്ക് നയിക്കുമായിരുന്നു, “കർത്താവ് മുന്നറിയിപ്പ് നൽകിയതു പോലെ പുഴു ചാകാതെയും തീ കെടുത്താതെയും ഇരിക്കുന്നിടത്ത്,” പാപത്തിലും കഷ്ടപ്പാടിലും മരണത്തിലും രോഗത്തിലും എന്നേക്കും ജീവിക്കുന്ന അവസ്ഥ. നാം തുടര്മാനമായി പാപം ചെയ്യുമ്പോൾ കർത്താവ് നരകത്തിൻ്റെ യാഥാർത്ഥ്യത്തെക്കുറിച്ച് നമുക്ക് മുന്നറിയിപ്പ് നൽകുന്നു. അത്തരം വിധികളിലൂടെ അവൻ പലപ്പോഴും നമ്മെ നരകത്തിൽ നിന്ന് രക്ഷിക്കയാണ്. 1 കോരി 5: 5പൌലോസ് പറയുന്നു “അത്തരമൊരു വ്യക്തിയെ 5 ആത്മാവു കർത്താവായ യേശുവിന്റെ നാളിൽ രക്ഷിക്കപ്പെടേണ്ടതിന്നു ജഡസംഹാരത്തിന്നായി സാത്താന്നു ഏല്പിക്കേണം എന്നു വിധിച്ചിരിക്കുന്നു.”
അവസാനമായി, ദൈവത്തിൻ്റെ ന്യായവിധികൾ അന്തിമമാണ് എന്ന് തെറ്റിദ്ധരിച്ച് നാം നന്മ ചെയ്യുന്നത് ഉപേക്ഷിക്കണമെന്ന് ദൈവം ഒരിക്കലും ആഗ്രഹിക്കുന്നില്ല. രൂബെൻ, ശിമയോൻ, അല്ലെങ്കിൽ ലേവി ഗോത്രങ്ങൾ മറ്റെല്ലാ ഗോത്രങ്ങളെയും പോലെ കർത്താവിൻ്റെ സന്നിധിയിലേക്ക് സ്വാഗതം ചെയ്യപ്പെട്ടിരുന്നു. ദൈവഭക്തി അപ്പോഴും അവരുടെ കടമയും ജന്മാവകാശവുമായിരുന്നു. വാസ്തവത്തിൽ, അബ്രഹാമിന്ന് 400 വർഷങ്ങൾക്കുശേഷം ലേവിയിലേക്കും മോശയിലൂടെ നേതൃത്വത്തിലേക്കും പൗരോഹിത്യം നിയമിക്കപ്പെട്ടു.
വേഗമേറിയതും അനിയന്ത്രിതവുമായ കോപമുള്ള ഒരു മനുഷ്യനായി മോശയും തന്റെ ജീവിതം ആരംഭിച്ചു. മിദ്യാന്യ മരുഭൂമിയിൽ, മഹാനായ ഈ മിസ്രായേമ്യ പണ്ഡിതൻ ഒരു ഇടയനായി 40 വര്ഷം ജീവിച്ചു. എല്ലാവരേക്കാളും സൗമ്യനായ മനുഷ്യനാകുന്നതുവരെ നീണ്ട ദശാബ്ദങ്ങളിൽ ദൈവം അവനെ പഠിപ്പിച്ചു.
ദൈവം നമ്മെക്കുറിച്ച് പറയുന്നത് സ്വീകരിക്കാൻ നമുക്ക് മനസ്സൊരുക്കമുള്ളവരായിരിക്കാം. അത് നേരിട്ടോ അവൻ്റെ ദാസന്മാരിലൂടെയോ നമ്മോട് സംസാരിച്ചെന്ന് വരാം. ദൈവിക ആലോചനകള് നമ്മുടെ സഭയിൽ നിന്നോ നമ്മുടെ മൂപ്പന്മാരിൽ നിന്നോ കുടുംബത്തിൽ നിന്നോ സുഹൃത്തുക്കളിൽ നിന്നോ വന്നേക്കാം. അത് സ്വീകരിച്ച് പ്രവർത്തിക്കുന്നതിലൂടെ നാം ദൈവത്തെ ആദരിക്കുന്നു. അവൻ്റെ നിഷ്പക്ഷതയിലും നന്മയിലും നാം വിശ്വാസം പ്രകടമാക്കുന്നു. അങ്ങനെയുള്ള സത്യവചനങ്ങൾ കേൾക്കുന്നതിൻ്റെ അടിസ്ഥാനത്തിൽ നാം അവനെ പൂർണമായി അനുസരിക്കുന്നു. അത്തരമൊരു സാഹചര്യത്തിൽ, നമ്മുടെ വംശത്തിന്റെയോ കുടുംബത്തിന്റയോ പൂര്വ്വ പാപങ്ങള് ദൈവാനുഗ്രഹത്തിന് ഒരു തടസ്സമായി നില്ക്കുന്നില്ല.
മകളുടെ രോഗശാന്തിക്കായി യാചിച്ച കനാന്യ സ്ത്രീയുമായുള്ള സംഭാഷണത്തില് ഈ ആശയം നമ്മുടെ കർത്താവ് പ്രകടമാക്കുന്നു. “മക്കളുടെ അപ്പം എടുത്ത് നായ്ക്കുട്ടികൾക്ക് എറിഞ്ഞുകൊടുക്കുന്നത് നല്ലതല്ല” എന്ന് യേശു അവളോട് മറുപടി ഒരു പക്ഷേ ഒരു വിസമ്മതം പോലെ തോന്നിയേക്കാം. എന്നാൽ അവൻ പ്രാഥമികമായി യിസ്രായേല്യരുടെ അടുത്തേക്കാണ് അയച്ചതെന്ന സത്യം അവൾ മനസ്സിലാക്കിയെങ്കിലും അവൾ ദൈവം നല്ലവനാണെന്ന വിശ്വാസത്തില് ഉറച്ചുനിന്നു. “നായ്ക്കൾ പോലും യജമാനൻ്റെ മേശയിൽ നിന്നുള്ള നുറുക്കുകൾ തിന്നുന്നു.” എന്ന് മറുപടി പറഞ്ഞു. ദൈവമക്കൾ നിസ്സാരമായി നിലത്തുവീഴ്ത്തിക്കളയുന്ന കരുണയുടെ ഏറ്റവും ചെറിയ നുറുക്കുകള്ക്കായി ഏതൊരുവനും ദൈവത്തോട് യാചിക്കുവാനും ദൈവത്തിൽ നിന്ന് സ്വീകരിക്കാനും കഴിയുമെന്ന് അവൾ വിശ്വസിച്ചു. കർത്താവ് അവള് ആവശ്യപ്പെട്ടതു നല്കി അവളെ അനുഗ്രഹിച്ചു. “സ്ത്രീയേ, നിൻ്റെ വിശ്വാസം വലുതാണ്,” അവൻ അവളെ ഊഷ്മളമായി അഭിനന്ദിച്ചു. “നിന്റെ ഇഷ്ടം പോലെ ആകട്ടെ.”എന്ന് ഉത്തരം പറഞ്ഞു. ദൈവത്തിൻ്റെ നന്മയിൽ ആശ്രയിക്കുന്ന ഏതൊരാൾക്കും അത് ലഭിക്കും, എങ്കിലും നമ്മുടെ വിശ്വാസം പരീക്ഷയ്ക്ക് വിധേയമായെന്ന് വരാം.
ദുഃഖകരമെന്നു പറയട്ടെ, തന്റെ മൂത്ത മകനായ രൂബേനോടുള്ള യാക്കോബിൻ്റെ വാക്കുകൾ നിറവേറിയതായി തുടര്ന്നുള്ള ചരിത്രത്തില് നിന്ന് മനസ്സിലാക്കാം. ഈ ഗോത്രത്തിൽ നിന്ന് മികവുള്ള ആരും തന്നെ വന്നതായി നാം കാണുന്നില്ല. ഒരു ന്യായാധിപനോ പ്രവാചകനോ ഭരണാധികാരിയോ രാജാവോ ഈ ഗോത്രത്തില് നിന്ന് ഇല്ല എന്നുള്ളത് ശ്രദ്ധേയമാണ്. മോശയോട് മത്സരിച്ച ദാഥാനും അബീരാമും ഈ ഗോത്രത്തില് നിന്നായിരുന്നു. അസ്ഥിരമായ മനസ്സ് ദുരന്തത്തിനുള്ള ഒരു പാചകക്കുറിപ്പാണ്. നമ്മുടെ ജഡത്തിലും, ചിന്തയിലും നമ്മുടെ ജഡീക ആഗ്രഹങ്ങൾക്ക് വഴങ്ങുന്നതിനെതിരെ നാം ജാഗ്രത പാലിക്കണം. നമ്മുടെ പാപം ഉപേക്ഷിക്കാതെയും ഏറ്റുപറയാതെയും ഇരുന്നാല്, നമ്മുടെ കർത്താവിൻ്റെ കൃപ നമ്മെ വിടുവിക്കുകയും നമ്മുടെ പാപകള് കഴുകി നമ്മെ ശുദ്ധീകരിക്കുകയും ചെയ്യുമെന്ന് നമുക്ക് വിശ്വസിക്കാൻ കഴികയില്ല.
നമ്മെക്കുറിച്ചുള്ള സത്യം നമ്മോട് പറയുന്ന ദൈവം എത്ര നല്ലവനാണ്. നമ്മുടെ സ്വന്തം മൂഢമായ സ്വാർത്ഥതാൽപ്പര്യങ്ങൾ പിന്തുടരുമ്പോൾ നമ്മുടെ സ്വയം തീരുമാനത്തില് കൈകടത്താതിരിക്കുന്ന ദൈവം എത്ര ദയാലുവാണ്. ഇത് അനുതപിക്കാനും നമ്മുടെ മൂഢമായ വഴികൾ ഉപേക്ഷിക്കാനും നമ്മുടെ പാപം ഏറ്റുപറയാനും നമ്മെ പ്രേരിപ്പിക്കുന്നു. നമ്മുടെ പാപത്തിനെതിരെയുള്ള ദൈവത്തിൻ്റെ ന്യായവിധി നമ്മുടെ ജീവിതത്തിൽ അവൻ്റെ നീതിയിലേക്ക് നയിക്കും. ഹൃദയത്തിൽ നിന്നുള്ള താഴ്മയും സന്തോഷവും നിറഞ്ഞ സമർപ്പണത്തെ അടിസ്ഥാനമാക്കിയുള്ള കൂട്ടായ്മയിലേക്ക് നമ്മെ നയിക്കാൻ അതിന് കഴിയും. നാം അവൻ്റെ സത്യം അംഗീകരിക്കുകയും അവൻ്റെ ഇഷ്ടം അനുസരിക്കുകയും ചെയ്യും. ഇത് നമ്മെ വിശുദ്ധീകരിക്കുകയും പാപത്തിൽ നിന്ന് വിടുവിക്കുകയും ചെയ്യും. ഈ ന്യായവിധി തീർച്ചയായും അവനില് നിന്നുള്ള അനുഗ്രഹമല്ലേ?
ദൈവത്തില് നിന്നുള്ള സത്യം സംസാരിച്ചുകൊണ്ട് യാക്കോബ് തൻ്റെ മക്കളെ അനുഗ്രഹിച്ചു. നമ്മുടെ വാക്കുകൾ സ്നേഹത്തിൽ നിന്ന് ഉത്ഭവിക്കുന്ന സത്യത്തിൻ്റെ വാക്കുകളായി മാറട്ടെ. അസത്യവും, മുഖസ്തുതിയും ഉള്ളിടത്ത് സ്നേഹത്തിന്ന് സഥാനമില്ല. സ്നേഹം ആത്മാർത്ഥമായ സത്യത്തിലാണ് പ്രതിഫലിക്കുന്നത്, കാരണം സത്യത്തിന് മാത്രമേ നമ്മെ രക്ഷിക്കുവാന് സാധിക്കയുള്ളൂ. വഞ്ചനയിൽ നിന്നും അടിമത്തത്തിൽ നിന്നും നമ്മെ മോചിപ്പിക്കുവാൻ സത്യത്തിന് മാത്രമേ കഴികയുള്ളൂ. സത്യത്തിനു മാത്രമേ നമ്മെ കെട്ടിപ്പടുക്കുവാനും സ്നേഹത്തിൽ ബന്ധിപ്പിക്കാനും സാധിക്കൂ. എന്തെന്നാൽ, സത്യത്തിൽ കപടഭാവം ദര്ശിക്കുവാന് സാധിക്കയില്ല, എന്നാൽ വിശ്വാസത്തിന്റെ കണ്ണുകളാല് നോക്കുമ്പോള് നിരുപാധികമായ ദൈവസ്നേഹത്തിൻ്റെ മഹത്വം നാമതില് കണ്ടെത്തും. ദൈവം നമ്മെ അനുഗ്രഹിക്കട്ടെ.
Post a comment